النشرة اليومية 6

بسم الله الرحمن الرحيم


50% امتياز



النشرة اليومية (6)

...
ازيكم يا دكاترة عاملين ايه ؟ رجعنا النهاردة من اجازة ( خمس ايام بحالهم) وانتقموا مننا وخدونا يوم طويل عريض يجى 8 ساعات محاضرات وسكاشن ( حرام اللى بيعملوه فينا ده ) وزى ما اتعودنا هنكلم عن اللى حصل فى اليوم فى النشرة اليومية ولو فيه جاجة جديدة النهاردة يلا نبتدى النشرة .


1- تيم 50 %امتياز نزل النهاردة محاضرة الفارما مكتوبة متبيضة بالايد بشكل ظريف (يا رب تعجبكوا ) ونزلناها كمبيوتر هى وبقية المحاضرات ( عشان تذاكر من اللى انت عاوزه ) وباذن الله هنزل محاضرات النهاردة قريبا


2-الارقام بتاعتنا نزلت يا جماعة ( اخيرا عقبال الكارنيه ) واحلى حاجة ان الارقام زادت مقلتش (كل الدفعات بتقل الا احنا بنزيد)


3-كتاب الفارما نزل يا دكاترة


4_جدول الفارما نزل يا دكاترة وبصراحة جدول حلو وباذن الله هنزل الجدول فى ملف ورد بعد النشرة


5-الادوات المطلوبة فى سكشن الفارما :


خيط – دبابيس – طبق تشريح – مقص تشريح – forceps - pithing needle


نبتدى دلوقتى مع المحاضرات واللى حصل فيها


A-محاضرة الهوسبيتال


1-طبعا كلنا عارفين انها بتبتدى الساعة 8.30 وبيدينا الكورس دكتور عبد الحميد ( معلش بفكركوا )


2-دكتور عبد الحميد شرح حتى صفحة 19 فى الكتاب


3-دكتور عبد الحميد قال ان فيه سليدات مش موجودين فى الكتاب وهو نزلهم فى ورقتين كتر خيره بصراحة (الورقتين اتحطوا فى المكتبة )


4-دكتور عبد الحميد شرح زيادات كتير عشان يفهمنا وباذن الله الزيادات هتنزل مع المحاضرة فى ورق تيم 50% امتياز


B- محاضرة الفيتو


1-طبعا عارفين يا دكاترة ان المحاضرة بتبتدى الساعة 10 وبيدينا الكورس دكتورة ايمان


2-دكتورة ايمان قالت ان الكتاب هيتاخر شوية ( مش هينزل دلوقتى يعنى)


3-دكتورة ايمان قالت ان الكتاب مش هيبقى فيه السليد زى ما قالتلنا (يعنى زى كل سنة)


C- البرى لاب



1-كل اسبوع فيه برى لاب وفيه سكشن ( يعنى بيقضوا علينا بالثلث)

2-البرى لاب ابتدا من الساعة 1

3-خدنا Chapter 3 والمفروض هنجيبه محلول المرة الجاية فى السكشن
4-نصف المحاضرة كان برى لاب والنصف التانى ( المفاجاة) كانوا بيشرحوا الكتاب الثالث فى الهوسبيتال (شكله رخم)


5-الكتاب الثالث فى الهوسبيتال ( شوفوا الصدمة) عليه 60 درجة فى امتحان النظرى ( (paper بتاع الترم و10 درجات فى شيت نظرى العملى


6- الدكتورة قالت ان احنا لازم نبتدى نفكر فى مستقبلنا من دلوقتى عارفين الhospital pharmacist بياخد كام بيبتدى من 17000 جنيه ( ربنا يزيد ويبارك ما بنقرش ولا حاجة) زى دكتور شريف اللى شغال فى مستشفى 57 ( يا ترى بياخد كام دلوقتى؟ )


D- السكشن


1-السكشن بيقولوا فيه الاجوبة النهائية الا لو واحد طلب فيه مسالة الدكتور بيشرحها


2-الكتاب لازم يجى كامل كل مرة


3-كل مرة بيختاروا ناس يصححوا كتبهم


4-لازم كتابك يكون مصحح 3 مرات فى نهاية الترم (خللى بالكوا المرة ب5 درجات وبياخد المتوسط)


5-الدرجات فى السكشن متقسمة على تلات حاجات الACTIVITY و الattendence وال behaviour


بكره عندنا ايه ؟ ( معلش بفكركوا يا دكاترة )


عندنا محاضرة الفارما من الساعة 8.30 لغاية الساعة 10 ومحاضرة البارا من 10- 1 وسكشن البارا ( برضه ) من 1- 2 وده هيبقى فى المدرج وطبعا هناخد الكلام ده كله فى مدرج ( 17د ) وفيه سكشن فارما لناس قليلة بكره وهنزل الجدول


واى استفسار او ملاحظة على الورق اما تكلم على البروفايل Imteaz Road او يبعت على الايميل او يكلم دكتور محمد عبد العظيم او دكتور عبد الناصر